一直以來台語工作者佇社會上著攏無啥地位,會使講攏予人看無起,雖然今年度教育單位招考一批支援人員欲去學校教台語,毋過台語佇社會上亦是算作二等兮語言,所以從事台語工作兮人閣更加予人看無夠輕重啊! 佇我開始接觸著台語了後,我著一直為著欲爭取學校落實母語教育來打拚,毋過一直攏無啥進度,朋友嘛攏勸我勿愛閣liau5落去(1),一兮好好兮少年人頭路毋去食,佮人咧pua5-nua2(2)什麼台語,這款抗爭兮代誌毋是一、二工著會解決,何必佮人咧費精神,我知影in7是對我好,ta1(3)苦勸我,因為確實做台語工作兮人毋是愛放某放囡,就是愛傾家盪產,有因為台語來發達兮人確實是算e7出來,我時常佇半瞑a0咧想,甘正是愛an1-ne1(4) liau5落去,毋過一想著台語一直以來予人輕視,我著足毋甘願,想到這亦是卡早睏咧,瞑-a0-cai3(5)閣繼續打拚。 當我看著這本【台語這條路】兮時,可能是家己濟少有tu2著(6)共款兮情形,所以目kho1(7)一直紅紅,心肝頭仔一直燒-lun1(8)燒-lun1,台語這條路確實歹行,毋過若無這兮憨人願意付出,我相信台語即馬亦是禁止兮語言,著是有這先輩者兮打拚,所以台語ciah8會凍佇兮這咧困難兮環境中一直生衍,不管你是有欲逗陣走這條路兮同志,亦是支持阮兮朋友,或者是一直以來著排斥阮兮人,我攏歡迎你來看這本冊,看這兮人按怎咧替台灣打拚,按怎咧替台灣這塊土地付出in7兮心力。