■簡介 台灣第一本 台語文三代人的家族史 台灣母語振興者Lah-jih 上親切活跳ê庄跤囡仔家族史 　 台語文運動者蕭平治堅心傳承母語、用台語創作。對國校老師退休了後，家己學台語文拼音，佇90年代電腦網路起行的時陣，開發電腦拍字軟體，編寫教材、起網站blog，為著台語文運動拍拼奉獻二十外冬，持續推sak台灣主體性ê台灣學（Taiwanology）。 這本《Lah-jih身世kap親人》，是伊家族kap身世ê紀錄，透過上純粹、上媠氣ê台語書寫，寫出家己ê家族歷史，見證台灣佇清國、日本時代到今仔日ê中華民國三段殖民統治之下，台灣人民ê生活點滴，會使講是台灣殖民史ê縮影。 蕭平治（Lah-jih）佇本冊寫出祖厝歷史變遷、爸母慈愛ê事蹟、兄弟ê溫暖親情，mä有Lah-jih伊tī學校讀冊ê趣味代誌。內面有真濟話語是漸漸拍無去、已經失傳ê台灣話，這lóng是人類文化學kap 民俗學會當去研究ê好材料。這本冊定著是台語語言學真寶貴ê語料，同時也是台灣家族歷史書寫、歷史研究ê珍寶。