編著:臺灣總督府 適合年齡 類型 日語/台語 規格 精裝本 定價 每本800箍 這本冊 諺語是一地方風俗習慣兮精髓,亦是民族思想兮寫照,伊兮意思簡單,毋過意義卻是深遠,會使講是歸百冬(1)兮粒積(2),諺語有趣味性兮、有激骨兮、有講風俗兮嘛有講社會習慣兮,咱會凍按諺俗語發覺著誠濟做人做事兮道理。這本【台灣俚諺集覽】是日本人佇統治台灣兮時,由台灣總督府所印刷發行兮,雖罔(3)日本佇台灣是實行殖民統治,毋過對著台灣傳統兮文化卻是有做誠濟兮研究佮收集,親像針對著咱台灣兮諺俗語,日本著誠用心收集,佮即馬(4)台語已經慢慢失傳兮情況比起來,日本人對著台語文化兮重視甘但比咱台灣人閣卡盡心盡力; 這本【台灣俚諺集覽】將台灣兮諺俗語分做天文地理、神佛、命運、國家、人倫、道德、人、身體、衣食住及器用、職業、學事……等等二十兮部份,每一部份兮諺俗語攏做誠詳細兮解說,毋過佇拼音佮解說這方面是用日文所寫兮,如果若對日文無瞭解著無法度研究這本冊兮內容,我個人佇日文這方面無多方兮研究,毋過藉由漢字,對著冊裡兮內容uan1-na2有(5)淡薄仔認識,而世面上有誠濟兮諺俗語典我嘛有加減研究,所以更加予我欽佩日本人兮用心,雖罔這是一本台、日諺俗語對照典,毋過有心想欲研究台文兮人,嘛是會使參考這本冊,這確實是一本收集台灣諺俗語誠完整兮冊。 台文注譯 (1) 歸百冬---幾百年 (2) 粒積---累積 (3) 雖罔---雖然 (4) 即馬---現在 (5) uan1-na2有---也有