總編輯:胡萬川 適合年齡 類型 民謠歌曲/台灣 規格 平裝本 定價 每本200箍 這本冊 細漢兮時佮囡仔伴咧ci-tho(1)兮時攏會唸寡歌謠,有兮即馬亦會記,有兮著完全無印象a0;最近世界各國針對著地方兮母語攏非常兮重視,咱台灣兮地方政府針對著這方面嘛有做一寡地方歌謠、故事、音樂、戲曲……等等兮收集,予咱優秀兮傳統文化勿會來失傳。毋過這兮文化作品兮收集卻是困難兮,因為常期以來台灣著受著殖民者兮統治,in7對台灣兮傳統文化並無重視,所以大批兮文化資產嘛來失散去,即馬咱欲去做補救確實是有伊兮困難性,毋過有誠濟兮台語文化工作者,in7無嫌艱苦,打拚收集這兮珍貴兮文化資料,向望會凍藉由文字兮記錄來傳承台語兮文化,親像這本【沙鹿鎮閩南語歌謠】著收集了六十首兮兒童唸謠,內容有分做兒童歌謠、儀式歌謠、節令歌謠佮一般歌謠,有誠濟首攏是咱逐家會曉唸兮歌,即馬唸起來著親像閣倒轉去細漢兮時陣共款,咱現在兮囡仔攏學一寡外來兮歌謠,毋但無台灣味,嘛無民族性,應該來學習這款正港台灣兮兒童歌謠才是正確,，假使序大人若會凍重視著囡仔兮本土教育這本【沙鹿鎮閩南語歌謠】是真好兮選擇。 台文注譯 (1) ci-tho---遊戲